കോഴിക്കോട് കളക്ട്രേറ്റിലെ സമരം അവസാനിപ്പിച്ച് എന്‍ജിഒ യൂണിയൻ.കളക്ടറുമായി നടത്തിയ ചര്‍ച്ചയിലാണ് സമരം ഒത്തു തീര്‍പ്പായത്.
10 വില്ലേജ് ഓഫീസര്‍മാരുടെ സ്ഥലംമാറ്റം പിന്‍വലിക്കാമെന്ന ഉറപ്പിലാണ് സമരം അവസാനിപ്പിച്ചത്. സമരം മൂലം നഷ്ടമായ സമയം നികത്താന്‍ അധികസമയം ജോലി ചെയ്യുമെന്ന് യൂണിയന്‍ അറിയിച്ചു.
ജീവനക്കാരുടെ കൂട്ടസ്ഥലം മാറ്റത്തില്‍ പ്രതിഷേധിച്ചാണ് ജീവനക്കാര്‍ സമരം നടത്തിയിരുന്നത്. കോഴിക്കോട് റവന്യൂ വകുപ്പിലെ 16 ഓഫീസര്‍മാരെ സ്ഥലം മാറ്റി ഉത്തരവ് ഇറങ്ങിയതിന് പിന്നാലെ ജീവനക്കാര്‍ കൂട്ടത്തോടെ സമരത്തിനിറങ്ങുകയായിരുന്നു. 12ദിവസത്തെ സമരത്തിനു ശേഷമാണ് പ്രശ്‌നം ഒത്തു തീര്‍പ്പായത്.
ഒരു തസ്തികയില്‍ മൂന്ന് വര്‍ഷം ഇരിക്കുക പോലും ചെയ്യാത്തവരെ ഒരുമിച്ച്‌ സ്ഥലം മാറ്റിയെന്നാണ് ജീവനക്കാരുടെ ആക്ഷേപം. സംഘടനയില്‍ പ്രവര്‍ത്തിച്ചിരുന്ന ഉദ്യോഗസ്ഥരെ തെരഞ്ഞുപിടിച്ച്‌ പ്രതികാരനടപടിയെന്നോണം സ്ഥലംമാറ്റിയെന്നാണ് യൂണിയന്‍ ആരോപിക്കുന്നത്.
ഫെബ്രുവരി 11-ന് ഈ കൂട്ടസ്ഥലം മാറ്റ ഉത്തരവ് പിന്‍വലിക്കണമെന്നാവശ്യപ്പെട്ട് എന്‍ജിഒ യൂണിയന്‍ മണിക്കൂറുകളോളം ജില്ലാ കളക്ടറെ ഉപരോധിച്ചിരുന്നു. എന്നാല്‍ അന്നും ഉത്തരവ് പിന്‍വലിക്കാന്‍ തയ്യാറല്ലെന്നായിരുന്നു കളക്ടറുടെ ഉറച്ച നിലപാട്.
Post a Comment