ഏകീകൃത തദ്ദേശസ്വയംഭരണ വകുപ്പ് നാളെ യാഥാർത്ഥ്യമാവും, മുഖ്യമന്ത്രി പ്രഖ്യാപനം നടത്തും

തദ്ദേശ സ്വയംഭരണ സ്ഥാപനങ്ങളുടെ പ്രവർത്തനങ്ങൾ ഊർജ്ജിതപ്പെടുത്താനും ജനങ്ങൾക്ക് കൂടുതൽ വേഗത്തിൽ വകുപ്പിന്റെ സേവനങ്ങൾ ലഭ്യമാക്കാനും ഉതകുന്ന വിധത്തിലുള്ള  ഏകീകൃത തദ്ദേശസ്വയംഭരണ വകുപ്പിന്റെ പ്രഖ്യാപനം ശനിയാഴ്ച (ഫെബ്രുവരി 19) മുഖ്യമന്ത്രി പിണറായി വിജയൻ നിർവഹിക്കും. കോവളം വെള്ളാറിലെ കേരള ആർട്സ് ആൻഡ് ക്രാഫ്റ്റ് വില്ലേജിൽ വൈകിട്ട് മൂന്നിനു സംഘടിപ്പിക്കുന്ന ചടങ്ങിൽ തദ്ദേശസ്വയംഭരണ വകുപ്പ് മന്ത്രി എം. വി ഗോവിന്ദൻ മാസ്റ്റർ അദ്ധ്യക്ഷത വഹിക്കും. വിദ്യാഭ്യാസ വകുപ്പ് മന്ത്രി വി. ശിവൻകുട്ടി, ഭക്ഷ്യ, സിവിൽ സപ്ലൈസ് വകുപ്പ് മന്ത്രി ജി. ആർ. അനിൽ, ഗതാഗത വകുപ്പ് മന്ത്രി ആന്റണി രാജു എന്നിവർ മുഖ്യാതിഥികളായി  പങ്കെടുക്കും.

തദ്ദേശസ്വയംഭരണ ദിനാഘോഷത്തിന്റെ ഭാഗമായി നാളെ രാവിലെ 10ന്  നവകേരള കർമ്മ പരിപാടി, സംയോജിത തദ്ദേശ സ്വയംഭരണ സർവ്വീസ് എന്നീ വിഷയങ്ങളെ ആസ്പദമാക്കി സെമിനാറുകൾ  സംഘടിപ്പിക്കും. തദ്ദേശസ്വയംഭരണ വകുപ്പ് അഡീഷണൽ ചീഫ് സെക്രട്ടറി ശാരദ മുരളീധരൻ വിഷയാവതരണം നടത്തും.

 നവകേരളം കർമ്മപദ്ധതി കോ- ഓർഡിനേറ്റർ ഡോ.ടി.എൻ.സീമ, സംസ്ഥാന ആസൂത്രണ ബോർഡ് മെമ്പർ പ്രൊഫ.ജിജു പി. അലക്സ്, ഗ്രാമപഞ്ചാത്ത് അസോസിയേഷൻ ജനറൽ സെക്രട്ടറി കെ.സുരേഷ്, ബ്ലോക്ക്പഞ്ചാത്ത് അസോസിയേഷൻ ജനറൽ സെക്രട്ടറി സി.എം. കൃഷ്ണൻ, അഡ്വ.ഡി. സുരേഷ് കുമാർ, എം.ഒ. ജോൺ, പ്രസന്ന ഏണസ്റ്റ് തുടങ്ങിയവർ സെമിനാറിൽ  സംസാരിക്കും.

 തദ്ദേശ സ്വയംഭരണ വകുപ്പ് (റൂറൽ)  പ്രിൻസിപ്പൽ സെക്രട്ടറി ഡോ. ഷർമ്മിള മേരി ജോസഫ്,  തദ്ദേശസ്വയംഭരണ വകുപ്പ്(അർബൻ) സെക്രട്ടറി ബിജു പ്രഭാകർ,  തദ്ദേശസ്വയംഭരണ വകുപ്പ്(അർബൻ) ഡയറക്ടർ ഡോ. രേണുരാജ്, എം.പി.അജിത്ത് കുമാർ, ഡോ.ജോയ് ഇളമൺ, പ്രമോദ്കുമാർ സി.പി, ജോൺസൺ കെ തുടങ്ങിയവർ മറുപടി നൽകും.

ഏകീകൃത തദ്ദേശസ്വയംഭരണ വകുപ്പിന്റെ പ്രഖ്യാപനവും സെമിനാറും സ്വരാജ് ട്രോഫി വിതരണവും മഹാത്മാ പുരസ്‌കാര സമർപ്പണവും സംസ്ഥാനത്തെ മുഴുവൻ തദ്ദേശ സ്ഥാപനങ്ങളിലും തത്സമയം പ്രദർശിപ്പിക്കും. www.facebook.com/mvgovindan, www.facebook.com/kilatcr, www.youtube.com/kilatcr എന്നിവയിലൂടെ പരിപാടികൾ വീക്ഷിക്കുവാൻ സാധിക്കും. തിരുവനന്തപുരം ജില്ല ഒഴികെയുള്ള ജില്ലകളിൽ ഫെബ്രുവരി 19ന് ജില്ലാ തലത്തിലും ബ്ലോക്ക്  തലത്തിലും സെമിനാറുകളും ചർച്ചയും സംഘടിപ്പിക്കും. ജില്ലാ തല ജേതാക്കൾക്കുള്ള പുരസ്‌കാരങ്ങൾ ജില്ലാതല ആഘോഷ പരിപാടിയിൽ വിതരണം ചെയ്യും.