എത്ര തവണ ജയിച്ചാലും ഇനി ഒറ്റ പെൻഷൻ; പഞ്ചാബിൽ MLA പെൻഷൻ വെട്ടിക്കുറച്ചു.

പഞ്ചാബിൽ ഇനി മുതൽ എംഎൽഎമാർക്ക് ഒരു ടേമിന് മാത്രമേ പെൻഷൻ നൽകൂവെന്ന് മുഖ്യമന്ത്രി ഭഗവന്ത് മാൻ. നിലവിൽ ആയിരത്തിലേറെ കോടി രൂപയാണ് മുൻ എംഎൽഎമാർക്ക് പെൻഷൻ നൽകാൻ ചെലവഴിക്കുന്നത്. എന്നാൽ പുതിയ തീരുമാനത്തിലൂടെ ഈ പണം പഞ്ചാബിലെ സാധരണക്കാർക്കായി മാറ്റിവെയ്ക്കാനാകുമെന്ന് മുഖ്യമന്ത്രി പറയുന്നു.

മുൻ എംഎൽഎമാർ അവർ രണ്ടു തവണയോ അതിൽ കൂടുതൽ തവണയോ ജയിച്ചവർ ആയാലും ഒരു തവണത്തേക്ക് മാത്രമേ പെൻഷൻ നൽകൂ. പലതവണ എംഎൽഎ ആയവർ പിന്നീട് എംപിയായി അതിനൊപ്പം എംഎൽഎ പെൻഷൻ കൂടി വാങ്ങുന്നുണ്ടെന്നും ഇത് അവസാനിപ്പിക്കുകയാണെന്ന് ഭഗവന്ത് മാൻ പറഞ്ഞു.പുതിയ തീരുമാനത്തിലൂടെ 75,000 രൂപയോളം മുൻ എംഎൽഎമാർക്ക് ഇനി മുതൽ മാസം തോറും പെൻഷൻ ലഭിക്കും. പിന്നീടുള്ള ഓരോ തവണയ്ക്കും 66 ശതമാനം തുക അധികം ലഭിക്കുന്നതാണ് നിലവിലെ രീതി. ഓരോ മാസവും 3.50 ലക്ഷം മുതൽ 5.25 ലക്ഷം വരെ പെൻഷൻ വാങ്ങുന്നവരും പഞ്ചാബിലുണ്ട്.