മലപ്പുറത്ത് കുട്ടികൾ മൈതാനമുണ്ടാക്കാൻ കിളച്ചപ്പോൾ കിട്ടിയ പിവിസി പൈപ്പിനുള്ളിൽ വടിവാളുകൾ.

മലപ്പുറം മമ്പാട് ആളൊഴിഞ്ഞ സ്ഥലത്തു നിന്നും കുഴിച്ചിട്ട നിലയിൽ അഞ്ച് വടിവാളുകൾ കണ്ടെടുത്തു. പി.വി.സി. പൈപ്പിനുള്ളിൽ ഒളിപ്പിച്ച നിലയിലാണ് വടിവാളുകൾ സൂക്ഷിച്ചിരുന്നത്. വടിവാളുകൾ തുരുമ്പെടുത്ത നിലയിലാണ്. 4 വർഷമെങ്കിലും പഴക്കമുള്ള വടിവാളുകളാണെന്നാണ് പൊലീസ് പറയുന്നത്. മമ്പാട് കാട്ടുപൊയിൽ നിന്നുമാണ് വടിവാളുകൾ കണ്ടെടുത്തത്. 

 വടിവാളുകൾക്ക് 58 സെന്റിമീറ്റർ വരെ നീളമുണ്ട്. ഇന്നലെ വൈകിട്ട് 6.30 ഓടെ കാട്ടുപൊയിലിലെ സ്ഥലത്ത് കുട്ടികൾ കളിക്കാൻ മൈതാനം ഉണ്ടാക്കാൻ തൂമ്പ കൊണ്ട് കിളക്കുമ്പോൾ പി.വി സി പൈപ്പിൽ തട്ടുകയായിരുന്നു. ഇത് തുറന്ന് നോക്കിയപ്പോഴാണ് വടിവാൾ കണ്ടത്.  പൊലീസ് സ്ഥലത്ത് എത്തി വാടിവാളുകൾ കസ്റ്റഡിയിൽ എടുത്തു. നിലമ്പൂർ പൊലീസ് കേസും രജിസ്റ്റർ ചെയ്തു. ഫോറൻസിക് വിഭാഗം, വിരലടയാള വിദഗ്ധർ, ബോംബ് സ്ക്വാഡ് എന്നിവർ പരിശോധന നടത്തി.  പൊലീസ് സ്ഥലത്ത് എത്തി തെളിവെടുപ്പ് നടത്തി.